Isyu sa China gigamit aron pabagsakon ang administrasyon…

By jess campos

Desperado na ang mga kritiko sa administrasyon busa gilakip ang isyu sa China gigamit na aron pabagsakon ang administrasyon ni Presidente Rodrigo Duterte.

Kini ang gipadayag ni Presidential Spokesman Salvador Panelo, subay sa labing ulahing survey sa Social Weather Stations (SWS) diin migawas nga 44% sa mga Pilipino wala motuo nga adunay maayong intensiyon ang Chinese government sa mga Pilipino.

Matud ni Panelo, nga bag-o na usab kini nga propaganda nga gipagawas sa mga kaatbang sa administrasyon human wala mosalir ang paggamit sa isyu sa debt trap sa China ug pagsang-at ug kaso sa International Criminal Court batok ni Chinese President Xi Jinping.

“The President’s ardent critics and detractors have become desperate in employing its anti-China card against the Duterte administration,” matud ni Panelo.

Sa survey, migawas nga 27% ang mga Pilipino ang nagtuo nga kadaghanan sa gustong mahitabo sa Chinese government sa Pilipinas alang sa kaayohan sa mga Pilipino, samtang 29% usab ang undecided.

Nagtuo ang Palasyo nga mausab ang pagtan-aw sa mga undecided ug sa mga wala mouyon.

Matud ni Panelo, posible nga ang wala mouyon mao ang naanad na sa alyansa sa Pilipinas ug Estados Unidos.

Matud ni Panelo, nga kinahanglan nga masayran sa publiko nga kinahanglan nga palapdan sa Pilipinas ang relasyon niini sa gawas sa mga traditional allies nga US ug Japan aron masabtan niini ang pagpalapad sa diplomatic relation sa nasud sa international community alang sa kaayuhan sa mga Pilipino.

Source From:https://www.abante.com.ph/isyu-sa-china-gigamit-aron-pabagsakon-ang-administrasyon-panelo.htm