Paggarahe kay Curry pinagbayaran ng GSW

IPINAHINGA ng Golden State si Stephen Curry, pinagbayad sila nina Luka Doncic at Dirk Nowitzki.

Sa kanyang posibleng hu­ling laro sa Oracle Arena, umiskor si Nowitzki ng season-high 21 points at inambus ng Dallas Mavericks ang Warriors, 126-91, Sabado ng gabi sa 73rd NBA 2018-19 elims.

Tumapos naman si Doncic ng 23 points, 11 rebounds at 10 assists, pang-anim na triple-double sa kanyang rookie season.

Sa bihirang pagkakataon, pinag-start si Nowitzki, 40, nasa kanyang 21st at maaa­ring final season na niya sa liga. Pinasalubungan siya ng palakpakan ng Oracle crowd.

Pinaliyab niya agad ang scoreboard sa nilistang 10 points sa first 4 minutes ng laro at umagwat ang Mavs 22-7.
“The last few games I didn’t have a good shooting rhythm,” lahad ni Nowitzki. “Today I had it early and ­often.”
Nalaglag ang Warriors (49-23) mula sa tuktok ng Western Conference stan­dings, kalahating laro na sa likod ng Denver (49-22).

Nagsumite si Kevin Durant ng 25 points, may 19 si DeMarcus Cousins sa Golden State na inalat sa 4-for-30 shooting mula 3-point range.

Sa kabila ay 21 for 49 sa labas ng arc ang Mavs.

Kapantay ng season-low ng Warriors ang apat na 3-pointers na naipasok. Sab­lay ang unang walong tira nila at hindi na nakarekober.

Papasok ng laro ay na­ngailangan si Durant ng isang 3-pointer para akbayan si Glen Rice (1,559) sa 25th place ng NBA career list, pero 0 for 8 siya sa long range sa nasabing laro.

Source From:https://www.abante.com.ph/paggarahe-kay-curry-pinagbayaran-ng-gsw.htm